Umrót í Þjóðmálum

Tímaritið Þjóðmál er bæði virðingarvert og fróðlegt ársfjórðungsrit.  Þar á Björn Bjarnason, fyrrverandi ráðherra, fastan samastað, "Af vettvangi stjórnmálanna". Þarna hefur hann í undanförnum heftum hrist úr klaufum og slett úr hala um Þriðja orkupakkann, eins og honum einum er lagið.  Er þar þó lítt af setningi slegið og skjóta þessi skrif skökku við málefnalegar greinar tímaritsins. Það er til að æra óstöðugan að elta ólar við téðan Björn, en í sumarheftinu 2019 keyrir þó svo um þverbak, að ekki verður með góðu móti hjá komizt að leiðrétta þennan fasta penna Þjóðmála, lesendanna vegna:

"Í ályktun landsfundarins segir: "Sjálfstæðisflokkurinn hafnar frekara framsali á yfirráðum yfir íslenskum orkumarkaði til stofnana Evrópusambandsins."  Þessi ályktun snýr ekki að þriðja orkupakkanum þótt andstæðingar hans láti þannig.  Í honum felst ekkert valdaframsal."

Báðar fullyrðingarnar á eftir tilvitnuninni í ályktun Landsfundar eru alrangar, eins og nú skal sýna fram á. 

Téður Björn hefur lesið rafmagnstilskipun Þriðja orkupakkans, eins og skrattinn Biblíuna, þannig að hann hefur öðlazt á orkupakkanum í heild öfugsnúinn skilning.  Hann gerir lítið úr áhrifum hans, og þau helztu séu aukið sjálfstæði Orkustofnunar til bættrar neytendaverndar.  Þetta éta þau hvert upp eftir öðru, sem helzt vilja sjá Alþingi aflétta hinum stjórnskipulega fyrirvara af OP#3.

Eftirlits- og reglusetningarstofnun ESB á orkusviði, ACER (Orkustofnun ESB), er með skrifstofustjóra á sínum vegum í hverju aðildarríki, og svo verður einnig í EFTA-löndunum þremur, sem aðild eiga að EES, eftir samþykkt OP#3, nema þar verður ESA (Eftirlitsstofnun EFTA) milliliður fyrir samskipti við skrifstofustjórann, sem hefur verið nefndur Landsreglari á íslenzku (National Energy Authority).  Þessi æðsti valdsmaður raforkumála á Íslandi eftir innleiðingu OP#3, sem verður algerlega óháður íslenzkum stjórnvöldum, en skyldugur til að framfylgja stefnu ESB í orkumálum, mun samkvæmt þessum orkulagabálki ESB (tilskipanir og reglugerðir OP#3) fá 2 meginverkefni:

a) að stuðla að myndun vel virks raforkumarkaðar, sem sé samhæfanlegur við raforkumarkaði ESB.

b) að ryðja öllum hindrunum úr vegi tengingar Íslands við hinn sameiginlega innri raforkumarkað ESB um aflsæstreng.

Verkefni a felur í sér að koma hér á fót markaðsstýringu raforkuvinnslunnar.  Hún felur það í sér, að vinnslu virkjananna verður alfarið stýrt eftir því verði, sem markaðsstjóri orkukauphallar úrskurðar, að feli í sér jafnvægi á milli framboðs og eftirspurnar.  Framleiðendum í þessu markaðskerfi ber engin skylda til að koma í veg fyrir orkuskort, og horfur á orkuskorti munu þrýsta orkuverðinu upp. Aðalviðmið framleiðendanna verður að hámarka tekjur sínar.  Eftir samtengingu íslenzka raforkukerfisins við innri markaðinn (með aflsæstreng), mun verðið til raforkunotenda á Íslandi ekki lengur ráðast af aðstæðum hérlendis, heldur munu íslenzkir raforkukaupendur þurfa að bjóða hærra verð en keppinautarnir erlendis til að fá orku, úr íslenzkum orkulindum eða með innflutningi um sæstreng. 

Er ekki deginum ljósara, að ályktun Landsfundarins hittir beint í mark að þessu leyti ?  Hann hafnaði frekara framsali á yfirráðum yfir íslenzkum orkumarkaði til stofnana ESB, en eftir innleiðingu OP#3 verða yfirráðin yfir íslenzka raforkumarkaðinum í höndum Landsreglara, sem er fulltrúi ACER, Orkustofnunar ESB.  Þeir, sem þræta fyrir þetta, hafa annaðhvort fallið í freistni orðhengilsháttar eða  ekki áttað sig á merkingu OP#3.

Felur þessi innleiðing á markaðsstýringu orkuvinnslunnar að hætti ESB í sér valdframsal ?  Já, það er enginn vafi á því.  Þetta verður þvingað ferli, sem hugsanlega verður innleitt í óþökk yfirvalda, sem kunna að kjósa fremur þá orkulindastýringu, sem þróuð hefur verið um árabil innan vébanda Landsvirkjunar, en þarf að innleiða á landsvísu, ef fullur árangur á að nást (með lagabreytingu).  Þetta felur í sér að stofna til orkulindaskrifstofu, t.d. innan þess hluta Orkustofnunar, sem ekki mun heyra undir Landsreglara.  Þessi skrifstofa þarf að fá gögn frá öllum helztu virkjunum landsins, og hún þarf að hafa vald til að takmarka minnkun vatnsforðans í miðlunarlónum til að draga úr hættu á orkuskorti og sömuleiðis til að halda álaginu á gufuforðabúr virkjaðra jarðgufusvæða innan vissra marka til að endingartími forðabúrsins verði sem lengstur. "Orkulindastjóri" þarf líka að geta beitt hvötum til að hefja nýja virkjun í tæka tíð til að forða aflskorti.   

Það er mjög líklegt, að Landsreglari/ESA/ACER muni telja þetta óleyfilegt inngrip ríkisvaldsins í frjálsan markað, þar sem óheft fjórfrelsið á að ríkja, svo að ríkisstjórn og Alþingi muni ekki komast upp með nýja lagasetningu, sem nauðsynleg er, til að orkulindastýring Landsvirkjunar verði útvíkkuð á landsvísu.  

Þessi rökleiðsla varpar ljósi á, að innleiðing OP#3 felur í sér valdframsal, sem bannað er í tilvitnaðri Landsfundarályktun sjálfstæðismanna frá marz 2018.  Hér er reyndar um að ræða valdframsal til erlendrar stofnunar, sem bindur hendur stjórnvalda og löggjafa og kallast þess vegna fullveldisframsal.

Þjóðmál vetur 2011

   

 

   

 


« Síðasta færsla | Næsta færsla »

Athugasemdir

1 Smámynd: Jón Valur Jensson

Já, Björn Bjarnason nálgast það óðfluga, í viðskiptum sínum við þjóðvarnarmenn, að vera orðinn eins og mannýgt naut í orkupakkamálinu, kominn með klaufir og hala! Þessu skal ég trúa upp á hann! yelltongue-out

Jón Valur Jensson, 11.8.2019 kl. 23:11

2 Smámynd: Halldór Egill Guðnason

 Við orkupakka 1 og 2 hækkaði raforkuverð til mín um 4%. 

 Ástæðan var milliliður, sem þessir pakkafjandar lögðu stjórnvöldum á herðar. 

 Ef pera springur í ljósastaur í götunni minni, get ég ekki hringt í bæjarstjórnarskrifstofuna, til að fá henni skipt út. Ég þarf að heingja símtal eftir símtal, þangað til ég kemst að því hver á að skipta um perufjandann! Þegar það lokains tekst, þarf ég að borga fyrir þjónustuna!

 Esb í hnotskurn og hver sem heldur því fram að op3 snúist um neytendavernd, er annaðhvort algerlega galinn, eða sá sem selur peruna.

 Góðar stundir, með kveðju að sunnan.

Halldór Egill Guðnason, 12.8.2019 kl. 04:06

3 Smámynd: Jón Valur Jensson

Einmitt, Halldór Egill. Orkupakkar 1 og 2 höfðu hér áhrif til hækkunar orkuverðs, m.a. til 50% hækkunar næturtaxta til bakaría og um 60 til yfir 90% hækkunar á rafmagni til húsahitunar. "Neytendavernd"!!!undecidedlaughing

Og enn versnar það með orkupakka #3 og þaðan af verra með OP#4.

En Bjarni Ben & Co. stefna beina leið fram af bjarginu með flokkinn og sjálfa sig, en vilja gera landsmenn alla að fórnarlömbum stefnu sinnar í leiðinni, með miklum dýrtíðaráhrifum hér! Takist þeim það, verður eina varnarleiðin að segja upp EES-samningnum. Sjáðu hér, Björn óframsýni Bjarnason, hverju þú ætlar að koma hér til leiðar!

En Bjarna verkfræðingi Jónssyni ber að þakka greinina hér fyrir ofan, sem enn einu sinni ber fram sannleiksvitnisburð sinn til sigurs í rökræðunni, hvernig sem fara kann í spilltum stjórnmálaveruleika okkar!

Jón Valur Jensson, 12.8.2019 kl. 05:54

4 Smámynd: Bjarni Jónsson

Prófessor Ragnar Árnason hefur út frá gögnum Hagstofunnar reiknað það út, að meðalraunhækkun raforkuverðs í landinu frá 2003-2008 hafi orðið 7 % - 8 %.  Iðnaðarráðherra flaggaði annarri niðurstöðu í pistli í vor, þar sem hún vísaði í aðkeypta athugun iðnaðarráðuneytisins um, að raunverð væri nú svipað og 2003.  Athugun Ragnars mun væntanlega birtast í skýrslu seinna í ágúst 2019.  Málflutningur Þórdísar Kolbrúnar um, að orkupakkarnir gagnist neytendum, er ótrúverðugur, enda segja staðreyndir málsins annað.

Bjarni Jónsson, 12.8.2019 kl. 11:13

5 Smámynd: Bjarni Jónsson

Tímabilið hér að ofan átti að vera 2003-2018 (ekki 2008).  Orkupakkarnir eru byrði á íslenzka hagkerfinu, þó að þeir létti undir við aðstæður, sem þeir eru hannaðir fyrir.  Væntanleg er skýrsla, sem sýna mun fram á þetta.

Bjarni Jónsson, 12.8.2019 kl. 21:38

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband