Kyndugur og hættulegur borgarstjórnarmeirihluti

Í Reykjavík eru viðhafðir stjórnarhættir, sem sæma ekki höfuðborg Íslands.  Þetta stafar af þröngsýni og afturhaldssemi núverandi meirihluta í borgarstjórn.  Þessi meirihluti undir borgarstjóranum, Degi Bergþórusyni, lækni, hefur bitið það í sig, að of margir bílar séu á götum Reykjavíkur, þeir valdi óþrifum, loftmengun og vegsliti.  Til að vinna bug á þessu vandamáli þurfi að fá íbúana, með illu eða góðu, til að nota Strætó í mun meiri mæli.  Þetta er kolröng, úrelt og óviðeigandi hugmyndafræði.

Bílaflotinn notar minna jarðefnaeldsneyti á ekinn km með hverju árinu, sem líður, vegna sparneytnari véla og fjölgunar rafmagnsbíla.  Með greiðara umferðarflæði og vetnisvögnum má auka loftgæðin enn meir.  Þar sem vegslit fylgir öxulþunga í 4. veldi, munar mjög mikið um vegslit strætisvagnanna.  Þótt borgaryfirvöld hafi lagt sig í líma við að tefja umferðina í Reykjavík með þrengingum gatna, fækkun akreina og frumstæðum ljósastýringum, m.a. á gangbrautum yfir akreinar, þar sem ætti fremur að vera undirgangur, hefur þeim ekki tekizt ætlunarverk sitt að auka hlutdeild Strætó í heildarfjölda einstaklingsferða í höfuðborginni.  Hún er enn 4 %. 

Með furðuverkinu borgarlínu er með ærnum kostnaði ætlunin að þrefalda þessa hlutdeild.  Það eru draumórar einir og má benda á aðrar borgir því til stuðnings, t.d. Bergen í Noregi, þar sem ekkert hægðist á fjölgun einkabíla í umferðinni við rekstur borgarlínu þar.  Sá rekstur er þar með bullandi tapi, sem bílaumferðin er látin standa undir með veggjaldi (bompenger), um 1000 ISK/dag. 

Liður í forneskjunni í Ráðhúsinu úti í Reykjavíkurtjörn er að standa gegn nútímalegum framkvæmdum Vegagerðarinnar, sem mundu bæta umferðarflæðið (draga úr töfum í umferðinni) og stórbæta öryggi vegfarenda.  Það er ljóður á ráði Vegagerðarinnar, að hún hefur fórnað hagsmunum vegfarenda í átökum við afturhaldið í Reykjavík. Þar þarf dýralæknirinn í forystu Vegagerðarinnar að taka sér tak.

Það er verr farið en heima setið að gefa nauðsynleg mislæg gatnamót upp á bátinn, en innleiða í staðinn forneskjulegar og stórhættulegar umferðarlausnir á fjölförnum gatnamótum, eins og ljósastýringar og vinstri beygjur, sem þvera umferð.  Forneskjulegur meirihlutinn í borgarstjórn misnotar skipulagsvald sitt hvað eftir annað til að hamra fram einstrengingsleg og fordómafull viðhorf, kenjar, sem eiga engan rétt á sér, því að lífi og limum borgaranna er stefnt í voða með þessu framferði.  Ábyrgðarleysið ríður ekki við einteyming, og nú verða Reykvíkingar að losa sig og aðra landsmenn við þessa óværu í sveitarstjórnarkosningunum í maí 2022.

Bjarni Gunnarsson, umferðarverkfræðingur, gerði skilmerkilega grein fyrir þessu og baráttu sinni í nafni hagsmuna vegfarenda í Morgunblaðinu, 25. marz 2022, í greininni:  

"Ógöngur gatnamóta".

Þar mátti m.a. lesa eftirfarandi:

"Vegagerðin, Reykjavíkurborg, Samgöngusáttmálinn og samgönguáætlun setja aukið umferðaröryggi og aukið umferðarflæði í fyrsta sætið, þegar hugað er að nýjum samgönguframkvæmdum.  Þess vegna er það óskiljanlegt, að núna, þegar ráðast á í eitt af fyrstu verkefnum Samgöngusáttmálans, er útfærslu gatnamóta Arnarnesvegar og Breiðholtsbrautar breytt frá því, sem var samþykkt í mati á umhverfisáhrifum árið 2003.  Breytingin felst í því að hætta við mislæg gatnamót, eins og Vegagerðin lagði til í matinu 2003, og byggja í staðinn ljósastýrð gatnamót, sem Vegagerðin taldi árið 2003, að ekki kæmu til greina. 

Þessi breyting hefur í för með sér eftirfarandi:

• Fleiri umferðarslys
• Meira eignatjón
• Minni afkastagetu gatnamótanna 
• Meiri umferðartafir
• Lengri akstursleiðir
• Meiri loftmengun
• Meiri umferðarhávaða við Nönnufell og Suðurfell
• Stærri mannvirki (fjögurra akreina brú í staðinn fyrir 2ja akreina)
• Breiðari rampa við Suðurfell (4 akreinar í stað 2)
• Litla breytingu á framkvæmdakostnaði

 Ef horft er á afleiðingar breytingarinnar, sést, að þær eru þvert á öll framsett markmið samgönguframkvæmda. 

Þetta er ótækt.  Það er óviðunandi niðurstaða, að útúrboruleg viðhorf borgarstjóra og meirihluta borgarstjórnar skuli fá að ráða því, að skilvirkni þessarar fjárfestingar, þ.e. árlegur þjóðhagslegur arður, skuli verða umtalsvert minni en fengizt hefði með mannvirkjalausninni, sem Vegagerðin lagði fram í upphafi og taldi bæði nauðsynlega og nægjanlega.  Lausn Reykjavíkur er hvorki nauðsynleg né nægjanleg. Hún er út úr kú og fullnægir ekki gæðaviðmiðum samgönguáætlunar Alþingis og ætti þar af leiðandi ekki að fá fjárveitingu úr ríkissjóði.  Það er kominn tími til að láta af undanlátssemi við fúsk og yfirgang borgarstjóra og hyskis hans.  Tafakostnaður umferðarinnar samkvæmt Hagrannsóknum sf. er um þessar mundir talinn vera allt að 60 mrdISK/ár, og á hann er ekki bætandi. 

"Vegagerðin á að gera umferðaröryggismat fyrir fyrirhugaðar samgöngubætur, og var það gert vegna breytingar umræddra gatnamóta.  Slíkt umferðaröryggismat á að vera grundvöllur þess, þegar bezti valkostur er valinn af Vegagerðinni og lagður fram í mati á umhverfisáhrifum. Umferðaröryggismat breytingarinnar (dags. jan. 2021) telur breytinguna slæma, og í niðurstöðum þess segir:

"Niðurstöður rýnihópsins eru, að mislæg gatnamót séu mun betri m.t.t. umferðaröryggis.  Sú lausn að aðskilja akstursstefnur, losna við stöðvun umferðar á umferðarljósum, og engar vinstri beygjur, þar sem þvera þarf gagnstæða umferðarstrauma, felur í sér mun öruggari umferðarmannvirki."

Þessi niðurstaða umferðaröryggismatsins virðist hundsuð af vegagerðinni sjálfri og er ekki kynnt fyrir Skipulagsstofnun, þegar Vegagerðin sendir sitt erindi um, að ekki þurfi að gera nýtt mat á umhverfisáhrifum gatnamótanna. Og ekki kynnir Vegagerðin Skipulagsstofnun þær neikvæðu breytingar, sem upp eru taldar hér á undan, þegar gatnamótin verða ljósastýrð." 

Þarna virðist vera á ferðinni "monkey business" hjá Vegagerðinni að undirlagi borgarinnar.  Forstjóri Vegagerðarinnar má ekki láta borgarstjóra draga virðingu og faglegan metnað Vegagerðarinnar ofan í svaðið.  Borgin hefur um alllanga hríð gert sig seka um undirmálsvinnubrögð, þar sem farið er á svig við góð og gild vinnubrögð og beztu fáanlegu tæknilausnir.  Þetta skemmda epli hefur skemmt út frá sér í stjórnkerfinu, þar sem gæðastjórnun og faglegum vinnubrögðum er gefið langt nef, en innleidd molbúavinnubrögð og sukk og svínarí við verkefnastjórnun.  Þetta skemmda epli fáfræði, þröngsýni og ofstækis, verða kjósendur að uppræta í næstu kosningum, nema þeir vilji áfram "lausnir", sem kosta mikið, en gera lítið gagn annað en að fullnægja duttlungum sérvitringa, sem eru aftarlega á merinni. 

Að lokum skrifaði Bjarni Gunnarsson:

"Samantekið í stuttu máli: Reykjavíkurborg tefur lausn málsins vegna 2ja akreina rampa við Nönnufell og endar á því að þröngva fram lausn með 4-akreina rampa við Nönnufell.  Vegagerðin gefst upp með sína útfærslu á mislægum gatnamótum og leggur til lausn, sem kom ekki til greina áður, og Skipulagsstofnun tekur við ófullnægjandi upplýsingum frá Vegagerðinni og túlkar svo lög um mat á umhverfisáhrifum á rangan hátt til að hleypa þessum skelfilegu breytingum gatnamótanna í gegnum kerfið. 

Svo verða vegfarendur gatnamótanna fórnarlömbin." 

Hér er lýst undirmálsvinnubrögðum ríkisstofnana að  boði Reykjavíkurborgar, molbúavinnubrögðum með misbeitingu skipulagsvalds höfuðborgarinnar. Niðurstaðan verður, að enn sígur á ógæfuhlið öryggismála umferðarinnar í Reykjavík, og er þó ekki á þá hörmung bætandi.  Ástæða þess, að Ísland trónir næsthæst á ógæfulista umferðarslysa á Norðurlöndunum, eru aðallega ófullnægjandi umferðarmannvirki; þau eru í raun frumstæð m.v. bílaflotann og þarfir almennings og atvinnulífs og þar af leiðandi úrelt. 

Með núverandi meirihluta áfram við völd og óbreytta afstöðu til umferðarmenningar þá mun Ísland lenda efst á þessum ógæfulista Norðurlandanna á næsta kjörtímabili.

Í Morgunblaðinu 2. apríl 2022 var gerð grein fyrir umferðarslysum undir fyrirsögninni:

"Umferðarslysum fjölgar umtalsvert".

 

"Athyglisvert er að bera saman tölur um fjölda látinna á hverja 100 þús. íbúa hér á landi við nágrannalöndin.  Að meðaltali létust 3,5 í umferðarslysum hér á landi ár hvert síðustu 10 árin.  Aðeins í Finnlandi láta fleiri lífið eða 4,2 að meðaltali.  Í Danmörku er meðaltalið 3,1, í Noregi er það 2,4 og í Svíþjóð 2,6."

Á meðan Reykvíkingar íhuga ekki betur en raun ber vitni um í höndum hvaða stjórnmálamanna hagsmunum þeirra er bezt borgið, er ekki von á góðu.  Þeir ættu að hafa í huga við kjörborðið, að kostnaður vegna umferðarslysa í Reykjavík nemur rúmlega 50 mrdISK/ár og tafakostnaður í umferðinni er jafnvel hærri upphæð.  Kostnaður vegna rangrar stefnu í umferðarmálum í Reykjavík er þannig a.m.k. 100 mrdISK/ár, og hann má skrifa á núverandi meirihluta borgarstjórnarinnar. Það er óskiljanlegt, að þetta viðgangist í höfuðborg landsins. 

Athugasemdir

[Sigurður Kristján Hjaltested, 2.5.2022 kl. 11:15]

Góður pistill Bjarni.

Það er líka óskiljanlegt liðið sem kýs þessa flokka.

Ein lélegasta borgarstjón sem Reykjavík hefur haft.

En því miður er ég ansi hræddur um að hann komi til með að sitja áfram og

eftir önnur 4 ár verður ekki hægt að bjarga Reykjavík frá þessum hryðjuverkum

sem þessi meirihluti er búin að koma til leiðar.

Sorglegt fyrir Reykjavík.

[Sævar Helgason, 2.5.2022 kl. 16:29]

Í smáborg einni- Zurich í bændaríkinu Sviss var einkabíllinn búinn að drekkja miðborginni eins og í útkjálkabænum Reykjavík norður á hjara.
Bændur í Zurich gripu til þess ráðs að stórhækka leigu á bílastæðum í miðborginni-svo um munaði-jafnvel tugi þúsunda á dag.
Þetta líkaði ekki hinum sparsömu bændum í Sviss . Þeir hættu að fara á  bílum til vinnu inn í miðborg Zurich-tóku Borgarlínuna.
Og bændur í Zurich færður skattinn að jöðrum borgarinnar með stiglækkun. Þessu fylgdi griðarlega góða nýtingu á Borgarlínu -þrif á skít og óþverra eftir einkabíla inni í borginni nánast hvarf. Miðborg Zurich er nú talin með þeim mannvænstu í Evrópu og margar vandræðaborgir að leita þangað til fyrirmyndar. Svona gætum við molbúar á Hb svæði Reykjavíkur- aldrei framkvæmt. Heldur bara röflað út einn um skít og óþrif :-)

[Bjarni Jónsson, 2.5.2022 kl. 20:53]

Ég er sammála því, sem þú skrifar hér, Sigurður Kristján.  Siðferði borgarstjóra er á svo lágu plani, að hann á ekkert erindi lengur sem borgarstjóri og hefur verið stórskaðlegur hingað til (Sundabraut, Reykjavíkurflugvöllur, aðalskipulagið og mislæg gatnamót).  Nú er hann tekinn að stunda leynimakk við stærsta hluthafann í Skel (Shell), sem Samfylkingin hefur áður hampað mjög með slæmum afleiðingum fyrir land og lýð.  Samfylkingin sprengir reykbombur til að komast hjá því að gera hreint fyrir sínum dyrum fyrir kosningar.  Hún kemst upp með spillinguna, því að fæstir fréttamenn kunna sitt fag, en eru bullandi vilhallir þessum stjórnmálaflokki í umfjöllun sinni og fréttavali.  Guði sé lof, að ástandið skuli þó ekki vera rússneskt.  

[Bjarni Jónsson, 2.5.2022 kl. 21:14]

Sæll, Sævar; Sem kúarektor og síðar kaupamaður í Vatnsdalnum fer ég hjá mér að lesa um þessa svissnesku sveitarómantík.  Ég var oft í Zürich vegna starfs míns hjá okkar gamla góða fyrirtæki í Straumsvík, en mig rekur ekki minni til að hafa séð þar liðvagnaferlíki taka upp 2 miðjuakreinar.  Þar eru aftur á móti sporvagnar, og járnbrautarlest, að talsverðu leyti neðanjarðar, tengir úthverfi og nærliggjandi bæi við miðhlutann, enda er þar "Hauptbahnhof".  Þegar ég fór á milli hótels míns í Zürich, miðsvæðis, og höfuðstöðvanna, tók ég járnbrautarlest.  Almenningssamgöngur í Sviss eru til fyrirmyndar, enda ganga lestir þar "eins og klukka", en það er líka mikið af bílum í Zürich.  Ef Svisslendingar stæðu frammi fyrir ákvörðun um að samþykkja fyrirbrigði, sem er umferðartæknilega jafnslæmt og óhagstætt og borgarlínan hér, er ég sannfærður um, að þeir mundu hafna slíku í atkvæðagreiðslu um málið.  Þannig leiðrétta þeir kúrs "hugmyndafræðinganna", sem vilja móta líf almennings.  

[Sævar Helgason, 2.5.2022 kl. 22:21]

Ég var að lesa grein eftir aðalráðgjafa við mótun og hönnun Borgarlínu. Bandarísk en af sænskum uppruna. Hámenntuð og reynd í þessum fræðum.
Hún ber saman Stokkhólm og Reykjavík vegna svipaðrar breiddargráðu. Það kom henni á óvart þetta gríðarlega einkabíla magn í Reykjavík sem hún telur einkar óskilvirkan ferðamáta í borg eins og Reykjavík. Borgarlína með biðstöðvum, lokuðum með rennihurðum vegna veðráttu gerðu þær mjög aðlaðandi biðstöðvar. Og fleira í þeim dúr.  Komin er tillaga að heildarplani
Henni sýnist að hér gæti orðið til "gull" útgáfa af bestu gerð Borgarlínu-á heimsvísu.
Mér sýnist höfuðborgarsvæðið stefna í þá átt .
Það er alveg útí hött að einhverjir borgarfulltrúar fari að beita hrepparíg mð hliðranir á þessari götu eða hinni og allskonar þrengingum fyrir einkabílinn. 
Þessvegna þarf að gjalda mjög varhug fyrir hugmyndum þessara  borgarfulltrúa sem stefnir í svoleiðis "figt" . 
Eins er í Hafnarfirði -að vernda gamla kofa og mynda þannig þrengsli og gera Borgarlínu þar að barstarði.
Um þetta verður kosið-núna. 
Það er stolt okkar á Hb svæðinu að eiga flotta Borgarlínu byggða með þekkingu bestu verkfræði. 

[Bjarni Jónsson, 3.5.2022 kl. 10:25]

Það er skrýtið að bera saman borgarlínulausn fyrir Reykjavík og Stokkhólm "vegna svipaðrar breiddargráðu".  Í fyrsta lagi er Stokkhólmur talsvert sunnar á hnettinum, og í öðru lagi er veðurfarið gjörólíkt.  Aðalmálið er þó það, að íbúafjöldinn á "upptökusvæði" borgarlínu í Stokkhólmi er miklu meiri en á "upptökusvæði" borgarlínu í Reykjavík.  Ég sé ekki snilldina við það að ausa mrdISK 50-100 í fjárfestingu, sem skilar engu, ef marka má reynslu Norðmanna, en veðurfarslegum aðstæðum á vesturströnd Noregs svipar auðvitað miklu meira saman við Reykjavík en veðurfarslegum aðstæðum á austurströnd Svíþjóðar.  Frá umferðarverkfræðilegu sjónarmiði sýnist mér, að "létt" borgarlína, eins og kynnt hefur verið af "Samgöngum fyrir alla", hafi yfirburði í samanburði við "þunga" borgarlínu, sem nú er á teikniborðinu að undirlagi núverandi borgarstjórnarmeirihluta.  

[Halldór Jónsson, 4.5.2022 kl. 10:12]

Fróðlegar og vitrænar umræður á bloggi kollega Bjarna

[Bjarni Jónsson, 4.5.2022 kl. 17:21]

Þakka þér fyrir þessa athugasemd, kollega Halldór.  Hvers vegna eru ekki öll tiltæk skotfæri nýtt í hinni pólitísku baráttu í höfuðborginni fyrir þessar borgarstjórnarkosningar ?  Ég er viss um, að kollega okkar, fyrsta formanni Sjálfstæðisflokksins og borgarstjóra um hríð, hefði blöskrað staðan, sem nú er uppi í höfuðborginni.