Fótalausar hugdettur um föngun og förgun CO2

Hræðsluáróðurinn um heimsendi handan við hornið af völdum hækkandi koltvíildisstyrks í andrúmslofti hefur fætt af sér ýmsar rándýrar viðskiptahugmyndir, sem haldið er lífi í með peningum úr alls konar styrktarsjóðum, m.a. frá Evrópska efnahagssvæðinu (EES).  Samt hafa heimsendaspámenn komið sér undan að svara því, hvað hafi valdið 4 hlýskeiðum á undan núverandi.  Vitað er, að ástæðan var þá ekki hækkandi styrkur koltvíildis í andrúmslofti. Hvað stjórnaði þessum hlýskeiðum þá ? Það er líka vitað, að mælingar og spár IPCC um þróun hitastigs eru mun hærri en vísindamanna, t.d. prófessors dr John Christy, sem vinna gögn úr hitastigsmælingum gervihnatta í veðrahvolfinu frá um 1980.  

Ein hugdettan er að sjúga CO2 úr verksmiðjureyk, en koltvíildisstyrkurinn þar er yfirleitt svo lágur, að þetta sog er rándýrt.  Það er dýrara en nemur bindingu CO2 með skógrækt á Íslandi.  Samt hafa nokkrar verksmiðjustjórnir áhuga á þessu, og er það vegna koltvíildisskattsins í Evrópu, sem fer hækkandi og nálgast 100 EUR/t CO2.  Af þessum sökum hefur Rio Tinto samþykkt að gera tilraun með þetta í Straumsvík, og stendur hún yfir.  

Út yfir allan þjófabálk tekur þó sú "viðskiptahugmynd" hjá "Coda Terminal" að flytja inn CO2 frá útlöndum, blanda það vatni úr Kaldánni, sem rennur út í Straumsvík, og dæla blöndunni síðan niður í bergið þar.  Hvers vegna er þetta út í hött ?  Það er vegna þess, að það er dýrt að einangra CO2 úr afsogi, og sá útlendingur, sem búinn er að því, getur selt það sem hráefni í rafeldsneyti, hvar sem er.  Það mun hann kjósa fremur en að borga undir það flutning til Íslands, dýra meðhöndlun þar og niðurdælingu. 

 Í Bændablaðinu 12. janúar 2023 birtist frétt og mynd af 4 manneskjum að undirrita viljayfirlýsingu í Ráðhúsi Hafnarfjarðar.  Þetta voru Rannveig Rist, Rósa Guðbjartsdóttir, Grettir Haraldsson og Edda Aradóttir.  Höfundur þessa vefpistils mun éta hattinn sinn, ef þessi viljayfirlýsing þróast áfram og raungerist í stórfellda niðurdælingu á innfluttu koltvíildi með ágóða.  Fyrirsögn fréttarinnar var þessi:

"Byggja kolefnismóttöku- og förgunarstöð í Straumsvík".

Hún hófst þannig:

"Carbfix, Coda Terminal, Hafnarfjarðarbær og Rio Tinto á Íslandi undirrituðu fyrir skömmu viljayfirlýsingu um uppbyggingu kolefnismóttöku- og förgunarstöðvar í Straumsvík undir heitinu Coda Terminal.  

Edda Aradóttir, framkvæmdastjóri Carbfix [á Hellisheiði - innsk. BJo], segir, að með verkefninu sé lagður grunnur að nýrri atvinnugrein hérlendis, sem byggir á íslenzku hugviti, sem geti með tímanum orðið að útflutningsgrein. 

"Ráðgert er, að fyrsti áfangi stöðvarinnar taki til starfa 2026 og að hún nái fullum afköstum árið 2031.  Fullbyggð mun stöðin geta tekið á móti og bundið um 3  Mt/ár af CO2, sem samsvarar meira en helmingi af árlegri losun Íslands", segir Edda."

Hér eru hátimbraðar hugmyndir á ferð, sem hætt er við, að aldrei verði barn í brók.  Áætlaður kostnaður er um mrdISK 50, og árið 2022 mun þessu verkefni hafa verið veittur styrkur úr Nýsköpunarsjóði Evrópu upp á um mrdISK 16.  Fyrir þetta fé verður líklega borað fyrir vatni við Straumsvík, því að verkefnið krefst mjög mikillar vatnstöku, og reist móttökustöð fyrir gas við höfnina.  Hér er rennt blint í sjóinn með arðsama nýtingu þessara fjárfestinga, því að varla fæst nokkur til að gera lagalega skuldbindandi samninga um afhendingu CO2 til langs tíma.

Nú hefur Evrópusambandið (ESB) samþykkt að hvetja aðildarlöndin með styrkveitingum til að tífalda framleiðslugetu sína á rafgreiningarbúnaði til vetnisframleiðslu úr vatni.  Innan 3 ára ætlar ESB að tífalda vetnisframleiðslu innan sinna vébanda, og verður hún þá 10 kt/ár.  Til hvers á að nota þetta vetni ?  Aðallega til að framleiða rafeldsneyti, og þar er CO2 hráefni.  Halda menn, að Coda Terminal geti keppt um hlutdeild í aukinni spurn eftir CO2 ?  Fátt styður það.

Nú styttist í, að ESB dragi úr úthlutun ókeypis  koltvíildiskvóta til evrópskra flugfélaga.  Ætlunin er að draga úr spurn eftir flugferðum innan Evrópu, með því að flugmiðinn verði svo dýr, að ferðalangar velji fremur járnbrautarlestir sem samgöngumáta.  Þetta mun bitna hart á flugfarþegum til og frá Íslandi, og verður ferðaþjónustan vafalaust fyrir verulegri fækkun ferðamanna, sem setur alvarlegt strik í íslenzkan þjóðarbúskap og afkomu fyrirtækja, sem gera út á ferðamenn.  Á sama tíma mun koltvíildiskvótinn á markaði hækka í verði vegna aukinnar eftirspurnar. 

Coda Terminal getur ekki orðið til bjargar í þessu máli, því að þá þyrftu flugfélögin að sjúga hundruði þúsunda tonna á ári af CO2 úr andrúmsloftinu, og það er hvorki tæknilega né kostnaðarlega fýsilegt.  Fýsilegra væri að gera samninga við skógarbændur um stóraukna bindingu með skógrækt. 

Hér er um svo mikið hagsmunamál að ræða fyrir Ísland, að utanríkisráðherra verður nú þegar að reka niður hælana á vettvangi EFTA, þar sem boð verði látið út ganga um það, að í Sameiginlegu EES-nefndinni muni Ísland leita eftir undanþágu, en ella hafna innleiðingu þessarar ESB-löggjafar (um skyldu flugfélaga til að kaupa koltvíildiskvóta) í íslenzkan rétt.  Það er tímabært að ræða þetta mál í utanríkismálanefnd Alþingis og móta afstöðu þar. Þar munu "the usual suspects" taka grunnhyggna afstöðu gegn hagsmunum eyríkisins. 

  

 

 

Athugasemdir

[Gunnar Heiðarsson, 14.3.2023 kl. 01:01]

Heill og sæll Bjarni

Það er margt skrítið í kýrhausnum, þegar að þessum málum kemur og virðist sem að það sé einhverskonar keppni í heimskupörum í gangi. Það verður gaman fyrir sagnfræðinga framtíðar að reyna að átta sig á hvað eiginlega hafi skeð í heiminum um og eftir síðustu aldamót.

Eitt dæmi um heimsku er framferði fyrirtækis er kallast Running Tide og á uppruna sinn í Ameríkunni. "Sérfræðingum" þess fyrirtækis hefur tekist að véla menn hér á landi í ævintýri sem er ótrúlegra en nokkur skáldsaga. Í stuttu máli þá er búið að flytja hingað til lands, frá Ameríku, gífurlegt magn af tréflís. Þessari flís á að hnoða í einhverskonar bolta og blanda við þá þara. Boltunum skal síðan sleppt nokkur hundruð mílum frá landi og eiga þeir að reka norður í íshaf og á þeim tíma á þarinn að blómstra. Þannig á þarinn að fanga co2 úr sjónum, þar norðurfrá. Hausinn er síðan bitinn af skömminni með því að stofnsetja þaraverksmiðjur um allt land, sem sker þarann úr sjónum og vinnur úr honum mjöl. Jú, af því það er svo umhverfisvænt!

Reyndar er þaramjölsframleiðsla þekkt hér á landi og hefur gengið ágætlega. Hitt er aftur vafasamara að ætla að reyna að rækta þara á einhverjum tréflísaboltum, sem væntanlega trosna mjög fljótt í sundur eftir að þeir blotna og velkjast um úthafið. Þegar síðan skoðaður er bakgrunnur þessa fyrirtækis, Running Tide, þá er hann ansi rýr. Er í raun byggður á framtaki eins mans, er tók upp á því að skera þara í fjöru til að fóðra skepnur sínar. Þarna sáu peningamenn leið til að komast í feita sjóði. Ef einhver glóra væri til í þessu, væri auðvitað einfaldara að hnoða saman flísaboltana þar sem tréflísin verður til, þ.e. í Ameríku. Sigla síðan með þá hálfa leið til Íslands og velta út í sjó. Þess í stað er siglt með nokkra stóra skipsfarma af tréflís til Íslands og boltarnir hnoðaðir þar og síðan siglt aftur hálfa leið til baka til að velta þeim í sjóinn. Þarna er líklega verið að horfa til sjóðakerfis ESB, að auðveldara sé að nálgast þá frá Íslandi en Ameríku.

Reyndar hefur ekki enn tekist að binda flísina saman í bolta, þó mikið hafi verið reynt. En það mun svo sem ekki breyta brjálæðinu, einhver önnur leið verður þá valin. Kannski verður flísinni bara sleppt óhnoðaðri í sjóinn og látin fljóta þar um eins og hvert annað rusl. Snemma í haust var prammi fylltur af flís sem ekki tókst að hnoða í bolta. Átti að draga hann út á haf og moka flísinni í sjóinn, en einhverjar alþjóðlegara stofnanir voru ekki allt of hrifnar af því, svo hann er nú bundinn inn við Kornagarð, með flísina um borð. Hefur verið þar í vetur.

Það þarf alveg einstak hugarfar til að láta sér detta þetta í hug og enn einstakara til að falla fyrir fagurgalanum. En það eru víst engin takmörk fyrir ruglinu, ef það er gert í nafni trúarinnar.

Kveðja

[Bjarni Jónsson, 14.3.2023 kl. 10:52]

Þakka þér fyrir þessa athyglisverðu sögu, sem ég hafði ekki heyrt um fyrr.  Svo virðist sem fólk reyni að marka sér sérstöðu og gera út á einfeldninga, sem þó ráða yfir sjóðum, oftast fjármögnuðum af opinberu fé eða opinberum fyrirtækjum, eins og ON í tilviki Carbfix.

Þessar tréflísar rotna í sjónum og mynda sterka gróðurhúsalofttegund, metan - CH4, þannig að þessi þörungatilraun er "futile" - gagnslaus og hefur aðeins kostnað í för með sér.  

[Hörður Þormar, 15.3.2023 kl. 14:16]

Það er fjallað um þetta á Youtube síðunni "Breaking lab", hef ég engu við það að bæta:                          Umstrittene E-Fuels: So will die Politik Verbrenner am Leben halten