Vatnaskil í hernaðarsögunni

Rússar og Kínverjar hafa lagt áherzlu á smíði ofurhljóðfrárra (v>5 Mach) eldflauga í þeirri von að ná frumkvæði á Vesturlönd á einu sviði hergagna.  Vesturlönd hafa ekki komið sér upp þessum vígtólum, enda kostar stykkið MUSD 10.  Vesturlönd hafa hins vegar þróað varnarbúnað, t.d. bandaríska Patriot-kerfið, sem þó hafði ekki fengizt reynsla af gagnvart ofurhljóðfráum eldflaugum fyrr en við varnir Kænugarðs 16.05.2023.

Hvernig fjallar sérfróður blaðamaður Morgunblaðsins, Stefán Gunnar Sveinsson, um þetta ?  Það kom fram í Morgunblaðinu 22. maí 2023 undir fyrirsögninni:

"Loftvarnirnar valda kaflaskiptum".

Fréttin hófst þannig:

"Segja má, að kaflaskipti hafi orðið í hernaðarsögunni í síðustu viku, þegar Úkraínumenn náðu að standa af sér 2 af stærstu eldflaugaárásum sögunnar aðfararnótt þriðjudags og miðvikudags [16.-17. maí 2023].

Rússar skutu þá [urmli] eldflauga að Kænugarði, og voru allar skotnar niður eða gerðar óvirkar af loftvarnarkerfum borgarinnar fyrra kvöldið.  Var þar um að ræða 18 eld- og stýriflaugar, sem skotið var með stuttu millibili [á um 1/2 klst-innsk. BJo] úr nokkrum mismunandi áttum [úr norðri, austri og suðri - innsk. BJo] á borgina í því skyni, að eldflaugarnar myndu yfirgnæfa [yfirlesta] loftvarnir hennar.  Þess í stað var þeim öllum grandað, auk þess sem 9 drónar voru einnig skotnir niður.

Næsta kvöld sendu Rússar 30 stýriflaugar af ýmsum gerðum og 4 dróna á höfuðborgina, og voru 29 af 30 eldflaugum skotnar niður og allir drónarnir 4."

Þarna opinberaðist tæknilegur og hernaðarlegur vanmáttur Rússlands, en stjórnendurnir eru smáir í sniðum og hafa ekki þrek til að viðurkenna ófarir sínar.  Það hefur orðið Rússum sérstakt áfall, að ofurhljóðfráar (hypersonic) (v>5 Mach = 6000 km/klst) eldflaugar komust ekki gegnum loftvarnir Úkraínumanna.  Shoigu, landvarnarráðherra, hefur séð sína sæng út breidda, því að hann neitaði að viðurkenna hina nýju staðreynd, og Putin lét í bræði sinni handtaka 3 af hönnuðum Dragger (Kinzhal) eldflauganna og ákæra þá fyrir landráð. 

Ekki verður það örvandi fyrir rússneska vísindasamfélagið og mun sennilega tryggja áframhaldandi hrörnun þess. Nú er svo komið, að NATO getur skotið niður allt, sem Rússar senda á loft, og þar með má ætla, að skálkaskjól rússnesku mafíunnar í Kreml, MAD, "Mutuallly Assured Destruction", sé ekki lengur fyrir hendi.  Vitað er, að rússneski herinn var með í áætlunum sínum að nota vígvallar kjarnorkuvopn, ef NATO tækist að snúa vörn í sókn, í skjóli MAD.  Nú eru þessar fyrirætlanir hrundar, og rússneski herinn er ekki til neins.  

Hvers vegna héldu Rússar, að vestræn loftvarnakerfi réðu ekki við ofurhljóðfráar eldflaugar ?  Það er vegna þess, að við Mach 5 hefur loftið við trjónu eldflaugarinnar orðið plasmakennt, og plasmað dregur í sig allar útvarpsbylgjur, þ.á.m. frá radarbúnaði loftvarnarkerfanna, sem þá greina óvininn of seint, því að t.d. Patriot Pac-3 flaugin fer aðeins á hraðanum Mach-4. 

Hvers vegna greindi þá 40 ára gamalt Patriot kerfið við Kænugarð Dragger-flaugarnar rússnesku ?  Það er vegna þess, að kerfið var látið breyta tíðni radarsins í átt að innrauða sviðinu þar til það fann Dragger-flaugarnar, sem gefa frá sér gríðarlegan hita.  Þessi þróun kom flatt upp á staðnaða Rússa, en það er miklu meira á döfinni en þetta. 

Til að girða fyrir, að heimsvaldasinnaðir einræðisherrar geti beitt langdrægum ofurhljóðfráum eldflaugum, sem fljúga mest megnis leiðarinnar á milli heimsálfa á 20 Mach, er Geimþróunarstofnun Bandaríkjanna (US Space Development Agency) að þróa net gervitungla, sem spanna á allan heiminn og búin eru innrauðum hitanemum, sem greina staðsetningarhnit heitra hluta á ferð í þrívíðu rúmi og senda upplýsingarnar til stjórnstöðva loftvarnarkerfa á jörðu niðri.  Kerfið heitir "Tranche 1 Tracking Layer" (T1TRK) og á að taka í brúk 2025. 

Í lokin skrifaði Stefán Gunnar:

"Þá eru áhrifin [af Kænugarðsafrekinu 16.05.2023] ekki einungis einskorðuð við mögulega heimstyrjöld.  Í greiningu Daily Telegraph á þýðingu árásarinnar segir, að eitt af því, sem gæti mögulega fært Rússum aftur frumkvæðið í Úkraínu væri, ef þeir gætu tekið út loftvarnakerfi landsins, svo að flugher Rússa gæti tekið yfirráðin í lofti.  Það markmið hefur gjörsamlega mistekizt til þessa allt frá fyrstu dögum innrásarinnar, og nú virðist ljóst, að jafnvel háþróuðustu vopn Rússa munu lítt duga til. 

Þá beinir Telegraph sjónum sínum sérstaklega að Xi Jinping og Kínverjum, sem hafa varið miklu til þróunar ofurhljóðfrárra eldflauga á síðustu árum.  Er þeim ætlað að takast á við flugmóðurskip Bandaríkjanna, ef til styrjaldar kemur við þau, en einnig gætu [þær] nýtzt til árása á Taívan-eyjuna.  Er bent á, að Taívan ráði einnig yfir Patriot-kerfinu, og því muni Xi og hershöfðingjar hans þurfa að íhuga, hvaða áhrif vopn þeirra muni hafa."

Atburðirnir 16. maí 2023, þegar allar 6 ofurhljóðfráu rússnesku eldflaugarnar, sem beint var að skotmörkum í Kænugarði, voru skotnar niður á um hálftíma, gjörbreytir hernaðarstöðunni Vesturveldunum í vil.  Þeir gera um leið mun friðvænlegra í heiminum en áður, því að atburðirnir umturna hernaðaráætlunum hinna samspyrtu einræðisríkja í austri, Rússlands og Kína.  Þau sjá nú sæng sína út breidda í átökum við Vesturveldin og munu þess vegna ekki dirfast að hefja kjarnorkuárás né annars konar árás.  Þau eru nú meðvituð um, að MAD er ekki lengur fyrir hendi, því að Vesturveldin geta skotið allt niður, sem einræðisríkin kunna að senda á loft. Þess vegna er nú orðið friðvænlegra í heiminum, og síðasta hálmstrá Putins, sem hann af hreinni geðveiki hefur hótað að beita í Úkraínu og nota til þess ofurhljóðfráar eldflaugar, eru ekki lengur neinn valkostur fyrir hann í bunkernum, og fælingarmáttur kjarnorkuvopna Rússa og Kínverja er ekki lengur fyrir hendi.  Vesturveldin eiga nú alls kostar við einræðisríkin. Svo er árvekni og færni Úkraínumanna við uppsetningu og beitingu hátæknilegs vopnabúnaðar fyrir að þakka.  Rússneska ríkjasambandið er með allt niður um sig. Það kom vel á vondan.  

 

 

 

Athugasemdir

[Ingólfur Sigurðsson, 26.5.2023 kl. 17:59]

 Þetta eru stór tíðindi vissulega. Einnig er þetta mikið áfall fyrir Rússa. Þó kann að vera að Rússar finni ráð gegn þessu. Þú notar orðtakið rétt, að sjá sæng sína útbreidda, en betra er að segja upp reidda, sem merkti upphaflega að leggjast í kör og eiga bana vísan, það er hér notað í réttri merkingu. 

Ég get þó verið ósammála þeirri bjartsýni að MAD áætlunin sé úr sögunni og ekki hætta af kjarnorkuvopnum Rússa. Hvað felst í því nákvæmlega að vopn Rússa séu skotin niður? Til dæmis vígvallarkjarnorkuvopn? Springa þau í háloftunum eða falla til jarðar annarsstaðar og valda einnig skaða? 

Ég fagna því ef friðvænlegra verður í heiminum, en efast um að nú geti Vesturlönd hrósað sigri yfir Rússlandi og Kína. 

En vissulega skiptir þetta máli, og kannski munu Rússar draga sig útúr Úkraínu. En við vitum báðir hvað stórveldin leggja mikinn kostnað í hergagnaframleiðslu og að svara nýjustu uppfinningum á því sviði. Það mætti kalla Rússland einræðisríki, en hættan sem stafar að lýðræðinu kemur líka frá ESB og valdastofnunum Vesturlanda.

Ef Rússar draga sig til baka þurfa frelsiselskandi þjóðir enn að berjast á móti síauknu valdabrölti í Brussel.

[Einar Sveinn Hálfdánarson, 26.5.2023 kl. 23:48]

Ég var að setja athugasemd hjá Páli Vilhjálmssyni, fylgjanda Pútins svohljóðandi: "Hver getur gert tilkall til Íslands eða hluta þess með sömu rökum? Það er ekki langt í að Pólverjar geti með sömu rökum gert kröfu til áhrifa og yfirráða á Íslandi. Bretar og Þjóðverjar hafa auðvitað sögulegan yfirráðarétt yfir fiskimiðunum við Íslandsstrendur. Og til að geta nýtt hann ti fulls, til yfirráða yfir Íslandi. 

Það færi ekki illa á að þeir sem fjalla mikið um Úkraínu og Krím kynntu sér svona helstu staðreyndir sögunnar."

Þá kom: "Eftirfarandi villur komu upp: Þér er ekki heimilt að skrá athugasemdir." - Þeir Páll og Pútín eru nefnilega andlegir samherjar.

[Bjarni Jónsson, 27.5.2023 kl. 13:44]

Varnarkerfi Vesturvelda gegn ofurhljóðfráum eldflaugum á að verða tilbúið 2025.  Það verður reist á neti gervihnatta, sem senda nákvæmar staðsetningarupplýsingar til næstu stjórnstöðvar.  Ég geri ráð fyrir, að renni tvær grímur á þá, sem taka ákvörðun um að senda kjarnorkuvopn upp í loftið, ef þeir geta átt á hættu, að flaugin springi löngu áður en hún kemst í áfangastað.  

Það er ekki hægt að bera saman hættuna af Rússlandi og Evrópusambandinu eða "valdastofnunum Vesturlanda".  Það er eitthvað "pútínskt" við slíkt hugarfar.  

[Bjarni Jónsson, 27.5.2023 kl. 13:51]

Það er sorglegt að sjá, hversu djúpt menn geta sokkið, þegar þeir gerast málsvarar stríðsglæpamanna Rússlands á Vesturlöndum.  Rússadindlar voru þeir áður kallaðir, sem gerðust handbendi Kremlverja, og það á enn við.  Það var og er enn ömurlegt hlutskipti og einhvers konar bilun.

[Guðmundur Jónsson, 28.5.2023 kl. 22:31]

Ég trúði einu sinni öllu sem kom frá MSM fjölmiðunum um klaufagang Rússa í hergagnasmíðum. En fyrir 26 árum síðan var ég staddur á flugsýningu með starfsmönnum Westland í UK þar sem Rússar sýndu í fyrsta sinn Sukohi SU 37. Það var mjög fróðlegt og uplýsandi fyrir mig að sjá upplitið á Westland-stafinu þegar þeim varð ljóst að Russarnir vor ártugum á undan þeim.

[Bjarni Jónsson, 29.5.2023 kl. 11:33]

Þeim tókst á Ráðstjórnartímanum, oft í krafti kommúnismans, að stela mikilvægum iðnaðarupplýsingum.  Afdrifaríkust voru kjarnorkugögn, en einnig hergagnagögn.  Rússnesk raunvísindi í iðnaðarþágu eru í molum núna.  Rússar hafa orðið fyrir miklum spekileka, og spillingin gegnsýrir stjórnsýsluna.  Úthlutað fé til verkefna rýrnar áður en það nær endapunkti.  Að rússneska flughernum skuli hafa mistekizt að ná yfirráðum í úkraínskri lofthelgi segir mikla sögu um vanmátt rússneskra hergagna.  Þegar landherinn mætir Challenger 2 og Leopard 2, verður lítið um rússneskt grobb og hroka.