Vesturlöndum stendur mikil ógn af glóruleysi Rússlandsstjórnar

Pútín, forseti Sambandslýðveldisins Rússlands, hefur gefið út tilskipun um, að rússneska ríkinu beri að vinna að því ná undir sig öllum löndum, sem voru innan vébanda Ráðstjórnarríkjanna, og öllum öðrum landssvæðum, sem Rússakeisari réði áður.  Til þessara svæða telst m.a. Alaska, sem Bandaríkjamenn keyptu af zarnum 1867.  Þessari tilskipun verður aðeins lýst sem geðveiki einæðisherra, en hún hlýtur að leiða til þess, að Vesturlönd, einkum Evrópuríkin, sjái skriftina á veggnum og endurhervæðist. Samþykkt Ráðherraráðs Evrópusambandsins (ESB) 01.02.2024 á mrdEUR 50 fjárhagsstuðningi við Úkraínu yfir 4 ár ber að fagna, en handbendi Pútíns, Viktor Orban, forsætisráðherra Ungverjalands, skipti um afstöðu til málsins, svo að samþykktin verð einróma.  

 Ef Donald Trump verður næsti forseti Bandaríkjanna, er ógnin geigvænleg, því að þessi fasisti mun svíkja Úkraínu og Eystrasaltslöndin og síðan öll önnur ríki Varsjárbandalagsins sáluga í hendur sálufélaga síns, Pútíns.  Hvernig hann bregzt við kröfunni um Alaska, er efiðara að ímynda sér.  

Nú standa Rússar blóðugir upp að öxlum i Úkraínu.  Vesturlönd verða að átta sig á því, að Úkraínumenn úthella nú blóði sínu ekki einvörðungu til varnar frelsi og sjálfstæði eigin lands, heldur allrar Evrópu. Þessi rússneska útþenslustefna og hatur á Vesturlöndum er ekki bundin við einn mann í Kreml, heldur hefur þessi vitfirring verið við lýði frá stofnun rússneska keisaradæmisins fyrir um 300 árum. Fleiri evrópsk keisaraveldi voru illa haldin af þessari áráttu á 19. og 20. öld, en 2 heimsstyrjaldir hafa læknað viðkomandi þjóðir af árásarhneigð og útþenslustefnu.

Rússneska þjóðin er fátæk og fjölmargir lifa undir fátæktarmörkum, enda viðgengst ægileg spilling og misrétti í Rússlandi.  Rússar hafa reynzt ófærir um að innleiða lýðræði hjá sér og sjúklegt hugarfar og afstaða til annarra þjóða hefur ekki breytzt þar.  Þar verður engin breyting til batnaðar, nema ríkið sundrist, sem gæti orðið við niðurlægjandi tap rússneska hersins í átökunum við úkraínska herinn.  Með óbreyttum stuðningi Vesturlanda verður það þó ekki, og afstaða Bandaríkjamanna ræður þar mestu um.  Það er ótrúlegt, að bandaríska þingið skuli ekki líta á fjárhagsstuðning á formi hergagna og annars við Úkraínu sem mjög hagkvæma fjárfestingu í framtíðinni. Ætlar skammsýnin og blindnin að verða Vesturlöndum að falli ?

Börkur Gunnarsson, kvikmyndaleikstjóri, er ýmsum hnútum kunnugur í Úkraínu og hefur dvalið þar.  Hann hefur frætt lesendur Morgunblaðsins um kynni sín af Úkraínumönnum.  Grein hans 22. janúar 2024 bar yfirskriftina:

       "Innrás Pútíns hefur allt önnur menningarleg áhrif en hann ætlaði":

"En menningarbreytingarnar í Úkraínu eru það, sem ég hef mestan áhuga á.  Sem áhugamaður um sagnfræði las ég mér mikið til um sögu þeirra ríkja, sem mynduðu Sovétríkin.  Þá var hefð [á] meðal sovézkra sagnfræðinga að gera lítið úr því, að það voru norrænir menn, sem áttu mikilvægan þátt í risi Kyiv, en margir rússneskir sagnfræðingar efuðust um heimildir, sem studdu það.  Það hentaði ekki stefnu Kremlar, að víkingar frá Norðurlöndunum ættu eitthvað í því stórveldi, sem Kyiv ríkið var frá 10. öld og fram til ársins 1240, að Mongólar sigruðu her ríkisins, myrtu flesta íbúana og brenndu höfuðborgina til grunna.  

En þegar ég tók viðtal við forstöðumann úkraínska þjóðminjasafnsins í höfuðborginni, varð mér ljóst, að í dag gera Úkraínumenn mikið úr þessum uppruna.  Kenningin er ekki aðeins rökum reist, heldur hentar hún þeim, sem nú stjórna."

Það voru aðallega sænskir víkingar í viðskiptaerindum  eftir fljótum Úkraínu á leið að Svartahafi og niður að Miklagarði, sem sáu sér hag í bandalagi við harðduglega heimamenn, sem þarna áttu í hlut, og má segja, að lengi hafi logað í gömlum glæðum ýmissa tengsla norrænna manna við Úkraínumenn.  Það hefur komið í ljós í blóðugri baráttu Úkraínumanna við arfaka Mongólaveldisins, Rússana, einkum efir innrásina 24. febrúar 2024. 

Blinda vestrænna leiðtoga lýðræðisríkja á söguna og framtíðina er tilefni til áfallastreituröskunar.  Þannig hefur það alltaf verið með þeirri afleiðingu, að hurð hefur skollið nærri hælum í 2 heimsstyrjöldum í viðureigninni við útþenslusinnuð einræðisríki. Bandaríkin komu þá til hjálpar, enda var ráðizt á þau í seinna skiptið og stríði lýst á hendur þeim, en svo bregðast krosstré sem önnur tré.  Fasistinn, sem nú um stundir stefnir hraðast á Hvíta húsið, en kann að verða settur á bak við lás og slá vegna afbrota sinna, er aðdáandi einræðisherra heimsins á borð við Pútín og hefur hótað því að draga Bandaríkin út úr NATO.  Hvers konar hrikalegt döngunar- og úrræðaleysi er það á meðal ríkisstjórna fjölmennustu þjóða Evrópu að hafa ekki nú þegar stóreflt hergagnaframleiðslu sína til að geta staðið myndarlega við bakið á Úkraínumönnum og birgt upp eigin herafla og gert hann bardagahæfan á ný ?  Á meðal Evrópuþjóðanna eru góðar undantekningar, og má þar telja Pólverja, Eystrasaltsþjóðirnar og Finna. 

Þann 23. janúar 2024 birtist önnur grein í Morgunblaðinu eftir sama höfund, Börk Gunnarsson.  Fyrirsögn hennar var þessi:

"Ekki viss um, að hann finni ástina sína í Úkraínu - Karlarnir berjast og konurnar fara".

Þar gat m.a. að líta eftirfarandi:

"Annar piltur, sem ég hitti, er ólmur að komast aftur á vígstöðvarnar og talar um, að það sé hneyksli, hvað Úkraína fái lítinn fjárhagslegan stuðning frá Evrópusambandinu, ungir úkraínskir menn séu að deyja fyrir Vesturlandabúa, á meðan þeir sitji bara uppi í sófa og hámi í sig kartöfluflögur. Maður fær samvizkubit yfir ræðum hans.  Því [að] það er mikið til í þeim.  Við eigum meira að segja fólk á Vesturlöndum, sem gerir lítið úr fórnum úkraínsku þjóðarinnar."

Hið síðast nefnda er hrollvekjandi staðreynd, sem nauðsynlegt er að horfast í augu við. Þessi lýður getur verið af tvennum toga: annars vegar Rússadindlar, sem hafa verið heilaþvegnir af áróðri Kremlar.  Þetta eru oft undanvillingar, sem af einhverjum sjúklegum ástæðum hafa fyllzt hatri á lifnaðarháttum Vesturlanda og fyrirlitningu á lýðræðisfyrirkomulaginu.  Sálfræðilega eru þetta einstaklingar svipaðrar gerðar og aðhylltust nazisma á fyrri tíð.  Hins vegar er um að ræða naflaskoðara með asklok fyrir himin og hafa þar af leiðandi engan skilning á því, hvers konar átök eiga sér stað í heiminum núna né hvers vegna Úkraínumenn leggja nú allt í sölurnar til að halda fullveldi lands síns og sjálfstæði.  Naflaskoðararnir hafa engar forsendur til að átta sig á hrikalegum afleiðingum þess fyrir eina þjóð að lenda undir járnhæl Rússa.  Í tilviki Úkraínumanna mundi það jafngilda tortímingu þjóðarinnar.  Rússneski björninn er viðundur í Evrópu 21. aldarinnar.  

Að lokum skrifaði Börkur:

"Ég hef sjaldan upplifað jafnlitla jólastemningu yfir hátíðarnar, en annað hefði verið undarlegt.  Innrás Rússa í Úkraínu hefur ekki aðeins leitt til dauða tugþúsunda ungra úkraínskra manna, lagt heimili hundruða þúsunda í rúst, heldur einnig rústað heilbrigði og sálarheill tugmilljóna manna þjóðar, fjölskyldum þeirra og börnum, sem munu vaxa úr gasi algjörlega trámatíseruð.  En á meðan getur íslenzkur almenningur borðað kartöfluflögur í rólegheitum í sófanum sínum og jafnvel verið með yfirlætislegar samsæriskenningar og ræktað í sér samúð með innrásarhernum, en ekki fórnarlömbunum."  

Hvernig halda menn, að fólki verði innanbrjósts, sem gengur til hvílu að kveldi vitandi, að húsið þeirra gæti orðið skotmark fjandmannanna um nóttina ?  Hernaður Rússa er eindæma lágkúrulegur.  Að gera saklausar fjölskyldur að skotmarki ónákvæmra flauga og dróna sinna í stað hernaðarmannvirkja er fyrirlitlega heigulslegt atferli, en Rússar eru til alls vísir.  Þeir eru á afar lágu plani bæði siðferðilega og tæknilega.  Fátæktin, andleg og veraldleg, er yfirþyrmandi.  

 

 

Athugasemdir

[Guðmundur Jónsson, 14.2.2024 kl. 21:29]

Vesturlöndum stendur miklu meiri ógn af innilega heimskum stjórnmálmönnum eins og Joe Biden og Jens Stoltenberg sem fóru í stríð sem allir óháðir hernaðráðgjafar sögðu þeim að útilokað væri fyrir þá að vinna.

[Arnar Loftsson, 14.2.2024 kl. 21:30]

allt saman rangfærslur og illa skrifuð grein. Róa sig á Rússafóbíunni.

[Bjarni Jónsson, 15.2.2024 kl. 17:59]

"Óháðir hernaðarráðgjafar".  Ha,ha.  Hvenær varð þetta gæðastimpill.  Eru þetta ekki sömu gosarnir og spáðu því, að Úkraína öll félli Rússum í skaut í febrúar 2022 ?

[Bjarni Jónsson, 15.2.2024 kl. 18:03]

Þessi Arnar Loftsson reynir þarna með aumkvunarverðum hætti fyrir sér með þöggun í anda gerspilltra einræðisherra.  Hvort ætli sé skárra að vera haldinn "Rússafóbíu" eða að vera Rússadindill ? 

[Guðmundur Jónsson, 15.2.2024 kl. 21:53]

Allir sem fylgjast hvað er að gerast þarna töldu að Russar mundu þurfa 3-5 ár til að klára verkefnið sem þeir kalla Special millitary opiration (taka vinstribakka Dniper). Þeir einu sem tala um að Russar séu að fara taka Úkrainu og svo Evrópu eru áróðursválar NATO (MSM) og þið sem kaupið bullið sem kemur þaðan. 

[Bjarni Jónsson, 16.2.2024 kl. 11:00]

Guðmundur: þú ættir að kynna þér sjálfur, hvað Pútín hefur sagt og skrifað um nauðsyn endurreisnar stórríkis Rússa í vestri.  Pútín er einfaldlega nýr Hitler að breyttu breytanda, sem boðaði og famkvæmdi "Drang nach Osten". Hann er Vesturlöndum stórhættulegur. Andvaraleysi og trúgirni, eins og þú sýnir gagnvart blóðþyrstum einræðisherra, er mjög ámælisvert. 

[Guðmundur Jónsson, 16.2.2024 kl. 13:57]

""þú ættir að kynna þér sjálfur, hvað Pútín hefur sagt og skrifað um nauðsyn endurreisnar stórríkis Rússa í vestri.""  Ég er búinn að því og komst að því að hann var að tala um hluta af austur úkrainu, svæði sem eru byggð 70-100% af rússneskumælandi Rússum sem tengja sig frekar til austur en vesturs. Ef þú getru fundið fyri mig heimildir aðran en MSM um annað væri það vél þegið. 

[Bjarni Jónsson, 16.2.2024 kl. 18:34]

Þetta er eins og hver önnur Kremlarlygi.  Hvers vegna lagði rússneski herinn höfuðáherzlu á að ná Kænugarði á sitt vald í upphafi innrásarinnar í Úkraínu 24.02.2022, ef ekki var ætlunin að steypa löglegri, þingræðislegri ríkisstjórn Úkraínu og hernema síðan allt landið ?

Það er einskær Rússalygi, að íbúar austurhéraðanna séu hallir undir blóði drifna kúgarana í Kreml.  Það kom svo greinilega í ljós, þegar úkrraínski herinn frelsaði Kharkiv-hérað.  Íbúar austurhéraðanna bíða óþreyjufullir eftir frelsun undan rússnesku oki, spillingu og fátækt.  Rússum fylgja hörmungar, hvar sem þeir fara yfir.  Saga rússneskra yfirráða í Úkraínu er ein samfelld sogarsaga.  

[Guðmundur Jónsson, 16.2.2024 kl. 19:39]

Rússneski herinn sem lagði af stað til Brelínar 1942 er talin hafa verið um 6 milljón manns undir vopnum og hálf milljón farartæki af mismunandi gerðum.  Í febrúar 2022 fóru Rússar inn í Úkrainum með um það bil einn hundraðasta af þeim herafla eða sextíuþusund hermenn.

Ef þeir hafa haldið að það dygði þeim til að leggja Evrópu að fótum sér hljóta þeir að vera upp til hópa heimskari en Biden og Stoltenber.

[Bjarni Jónsson, 17.2.2024 kl. 17:05]

Mannfallshlutfall Rauða hersins í átökunum við Wehrmacht var 33 %, og hið sama er uppi á teninginum núna hjá rússneska hernum í Úkraínu.  Herstjórnarlistin er fyrir neðan allar hellur.  Þessi tala, 60 k, er líkleega komin beint úr Kremlarkjaftinum.  Þeir voru a.m.k. ferfalt fleiri í innrásarhernum, og nú eru 400 k hermenn rússneska ríkjasambandsins fallnir í þessu innrásarbrölti, sem hernaðarlega var algerlega vanhugsað.  Pútín er ekki aðeins miskunnarlaus harðstjóri.  Hann er heimskasti stjórnmálamaður Evrópu, frá því að ríkisleiðtogi Stór-Þýzkalands var á dögum.